Nga foltorja e Kuvendit, ish-Kryeministri Sali Berisha akuzoi se krahas Parkut të Butrintit, Kryeministri Edi Rama ka parashikuar ndërtimin e 620 vilave te Kepi i Stillës dhe restorte turistike në vendin e quajtur Gjiri i Manastirit.
“Edi Rama, duke shfrytëzuar një plan menaxhimi të zonës A3, ka nxjerrë jashtë Parkut zonat e tjera dhe ka parashikuar të ndërtojë 620 vila në Kepin e Stillës, ka parashikuar të ndërtojë resorte të mëdha turistike në zonën e Gjirit të Manastirit”, u shpreh Berisha.
Ai akuzoi Fondacionin Shqiptaro-Amerikan të Zhvillimit (AADF) që prezantoi planin e menaxhimit, se janë shndërruar në mashë të Edi Ramës.
“Fondi është autori i planit të menaxhimit, Fondi ka bërë para këtij plani një plan tjetër menaxhimi të cilin nuk e publikon sepse nuk thotë pikërisht këto që thotë plani i dytë. Mund t’ju them edhe zotërinjve të Fondit, nuk ju takonte ju të shndërroheshit në një mashë të Edi Ramës, për të kënaqur ambiciet e tij të pafundme korruptive. Zotërinj të Fondit, dua t’ju pyes ju nga ky Parlament, a ekziston konflikti i interesit apo jo? A është konflikti i interesit një nga parimet madhore të korrupsionit? Nuk mundeni kështu! Pse nuk bëtë planin e menaxhimit për të gjithë Parkun Kombëtar? Shtoj këtu se zona A2, A3, kanë patur planin e menaxhimit. Kë pyetët ju që bëtë këtë hata me Parkun e Butrintit? Kush u pyet? Profesor Muraj, Profesor Bego, Profesor Bino? E kuptoni ju që aty ka pasuri biologjike natyrore të pafundme”, tha Berisha.
Ish-kryeministri kujtoi protestat e AADF kur qeveria e kaluar ndërhynte për të rikonstruktuar një rrugë dhe menjëherë organizoheshin protesta se prekej zona e mbrojtur.
“Unë kam pa asnjë diskutim respektin më të madh për kontributet e tyre shumë të mëdha në Shqipëri, në projekte. Por zotërinj të nderuar, keni qenë ju që kur qeveria e mëparshme zgjeronte një rrugë dhe protestonit pse u zgjerua rruga, që protestonit pse u hoq një zonë kreative siç ishte Ksamili që ishte hequr de facto. Kurse tani ju bëni një plan menaxhimi i cili shërben si pretekst për ata që duan të dinë të vërtetën për të rrëmbyer 830 ha toka me pasuri të shumëllojta dhe për të bërë ndërtime klani Rama dhe klanet e tjera”.
