Ish-Kryeministri Sali Berisha, i cili votoi në selinë e PD, në zgjedhjet për kreun e ri të kësaj partie, ku ai garon përballë Ibsen Elezit, e konsideroi si proces historik, jo vetëm për këtë forcë politike, por për të gjithë pluralizmin shqiptar.
Berisha ka ftuar masivisht demokratët të votojnë dhe të zgjedhin kandidatit që ata duan, ndërsa vuri theksin në transparencën e votës dhe atë që e konsideroi si dhënien fund të kryetarokracisë.
Ish-Kryeministri gjithashtu komentoi edhe procesin e zgjedhjes së presidentit, të cilin e konsideroi proces mafioz dhe anti-Kushtetues.
Berisha tha se Edi Rama po përpiqet të zgjedhë kreun e ri të shtetit duke përdorur kallp opozitën.
Ndërsa për zhvillimet e brendshme në PD, Berisha tha se nuk ka vendim gjykate që mund të ndalë lëvizjen, të cilën ai e konsideron një revolucion paqësor.
“Ky është një proces historik sepse është një proces që zhvillohet paralel me një proces mafioz dhe antikushtetues, ai i zgjedhjes së presidentit të Republikës.
Është mafioz dhe antikushtetues sepse bazohet mbi grabitjen e vullnetit të votës së shqiptarëve dhe kolaboracionizmit të shpifur të Edi Ramës me pseudo-opozitën.
Pra sot në këtë proces mbarëshqiptar, shohim dritën e shpresës për të ardhmen,” tha Berisha.
Deklarata e plote
Së pari përshëndes demokratët dhe demokratet, komisionerët e 108 qendrave të votimit në mbarë Shqipërinë dhe i uroj të marrin pjesë të gjithë në këtë proces historik jo vetëm për Partinë Demokratike por dhe për Shqipërinë dhe të votojnë sipas vullnetit të tyre të lirë, të votojnë sipas ndërgjegjes së tyre për kandidatin që duan.
Theksova që ky është një proces historik jo vetëm për PD-në por për mbarë Shqipërinë sepse është një proces që finalizon triumfin e vullnetit të anëtarëve të kësaj partie me votën e tyre, por sepse është një proces që zhvillohet paralel nga një proces i mrifilltë mafioz antikushtetues, ai i zgjedhjes së Presidentit të Republikës.
Është mafioz dhe antikushtetues sepse bazohet mbi grabitjen dhe dhunimin masiv të vullnetit të lirë dhe votës së lirë të shqiptarëve, dhe kolaboracionizmit të shpifur të Edi Ramës me kallp opozitën apo pseudo-opozitën.
Sot në këtë proces mbarëshqiptar shohim dritën e shpresës për të ardhmen.
Pyetje: Zoti Berisha, nëse zgjidheni sot, i druheni një vendimi nga Gjykata e Apelit që mund t’i ndryshojë gjërat?
Berisha: Nuk ka vendim, nuk ka vendim që mund të ndalë këtë mision historik të demokratëve shqiptarë.
