Ish-kryeministri Sali Berisha ka mbajtur fjalim pas fitores të padiskutueshme në zgjedhjet brenda PD-së, ku ishte rival me Ibsen Elezin.
Berisha tha në fillim të fjalimit se gjithcka “u krye”. Ish-kreu i PD-së shtoi se demokratët do ia dalin që të thyejnë këtë regjim.
“U krye! U krye mrekullia e vërtetë e shqiptarëve dhe e Shqipërisë në shekullin e 21, jo zgjedhja e Berishës. Procesi ishte mrekullia e vërtetë e shekullit të 21. Miqtë tanë amerikanë na kanë thënë se shqiptarët do jenë të lirë të zgjedhin udhëheqësit e tyre. Anëtarët e PD janë njerëz të idealeve më të larta e më fisnike e bënë historinë në një proces të mrekullueshëm. Mirënjohja shkon ndaj të gjithëve, kam mirënjohje të pakufijshme për anëtarët që sot me 22 maj lanë obligimet dhe votuan për të zgjedhur si qytetarë të lirë kryetarin e PD.
Unë kam bindjen se demokratët do ia dalin, sepse ne jemi gra e vajza, djem e burra që kemi për mision që të shpëtojmë Shqipërinë nga një regjim që kurrë nuk e meriton. Mirënjohje e vecantë shkon për të rinjtë shqiptarë që janë promotorë të lëvizjes, e betohem para tyre e shqiptarëve që ëndrrat më të bukura të të rinjve të bëhën realitet në Shqipëri. Kurrë mos thoni kurrë, ne do fitojmë”, tha Berisha.
