Kreu i Partisë Demokratike, Sali Berisha, deklaroi sot se kryeministri Edi Rama mund të ketë qenë i pranishëm në takimin famëzi të Arubas, i zhvilluar më 19 janar 2019, ku morën pjesë zyrtarë të lartë shqiptarë dhe grupe të fuqishme të narkos-it shqiptar dhe ndërkombëtar, të shpallura më vonë si organizata narko-terroriste.
Ai shtoi se në takim u diskutua për projekte të mëdha urbane në Tiranë, përfshirë “Syrin dhe Malin e Tiranës” dhe ndërtimin e kullave të larta, sipas interceptimeve të sakta që disponohen edhe nga disa agjenci ndërkombëtare, përfshirë Belgjikën dhe Mbretërinë e Holandës.
Berisha theksoi se, sipas tij, ky rast tregon për një kryeministër dhe kabinet të cilët kanë bashkëpunuar ngushtë me grupet e shpallura sot narko-terroriste ndërkombëtare.
“Tashmë, ky takim nuk është vetëm kronikë e medieve shqiptare. Nuk është vetëm denoncim i Sali Berishës, i cili në atë kohë, po të bëni një kontroll të kronikave tuaja, të lajmeve, i kam shtruar drejtpërdrejt pyetjen Edi Ramës: Ke marrë pjesë ti në takimin e Arubas apo nuk ke marrë?
Takimi i Arubas, sipas interceptimeve, tani nuk kemi më hamendje, sipas interceptimeve të antimafies italiane, të publikuara në një libër që ka dalë këto ditë, është zhvilluar me datën 19 janar të vitit 2019. Një grup ministrash, bashkëpunëtorë të narkoterrorizmit ndërkombëtar, kanë udhëtuar me një çarter në Aruba, që është një nga zonat më të hapura, më të lira të botës, protektorat i Mbretërisë së Holandës. Interceptimet për arsye, ta themi politike, ndonëse i kanë emër për emër pjesëmarrësit qeveritarë në takim, nuk janë bërë publike. Por, autori nuk ka më asnjë dyshim se kanë qenë ministra, zyrtarë të lartë të qeverisë së Edi Ramës, dhe në mundësinë më të madhe, vetë Edi Rama
“Në një takim famëzi ku është diskutuar për Syrin dhe Malin e Tiranës, për kullat dhe stërkullat e Tiranës, sipas interceptimeve të sakta të antimafies italiane. Këto interceptime disponohen dhe nga disa agjenci të tjera të vendeve partnere, Belgjika, Mbretëria e Holandës dhe agjenci të tjera.
Por, unë citoj këto se kanë dalë në procese gjyqësore, nuk jam i autorizuar të citoj agjenci që nuk bëjnë njoftim se e disponojnë dosjen Aruba. Pra, siç e shihni, ne kemi një kryeministër dhe një kabinet që është bashkëpunëtor i ngushtë i atyre që janë shpallur sot organizata narko-terroriste ndërkombëtare“, tha Berisha
