Ekzekutimi i Emiljano Ramazanit, krim i ndodhur më 20 korrik 2020, është po ashtu një punë e Nuredin Dumanit dhe bashkëpunëtorit të tij Enrik Hoxhaj, i njohur edhe si Riku. Kështu thuhet në dosjen hetimore të SPAK, referuar dëshmisë së dy personave të sipërpërmendur.
Henrik Hoxhaj jep detaje të rëndësishme në lidhje me porositësin, ekzekutorin si dhe rolin e tij në kryerjen e kësaj vepre penale.
Mes të tjerash, ai deklaron se ka qenë në rolin e ndihmësit në kryerjen e këtij krimi ku ka qenë personi i cili shfaqet si drejtuesi i automjetit tip Volsvagen që ka vajtur në vendin e ngjarjes dhe me të cilin janë larguar po nga vendi i ngjarjes.
Gjithashtu ai identifikon ekzekutorin e veprës penale i cili është Skerdi Tasi (personi i cili afrohet tek automjeti i viktimës dhe qëllon me armë zjarri ndaj viktimës Ramazani). Gjithashtu Henriku shpjegon se këtë vrasje e ka bërë me pagesë pasi këtë ia ka kërkuar i dyshuari tjetër në krim Nuredin Dumani.
Në lidhje me këtë vrasje ka dhënë shpjegime edhe Nuredin Dumani, i cili ndër të tjera ka shpjeguar se ka marrë porosi për vrasjen e shtetasit Emiljano Ramazani nga shtetasit Erion Alibej dhe Arjan Spahiu.
