Kreshnik Çollaku, deputeti i qarkut Dibër, shprehet se arritja e konsensusit për një president nga radhët e opozitës është një akt civil dhe normal në demokracitë.
Sipas tij, që një supermaxhorancë e majtë të balancohet nga një president i djathte, në cdo vend demokratik ky do të ishte një akt normal dhe civil.
“Që të përpiqesh të japësh legjitimitet kreut të shtetit duke tejkaluar fuqinë numrave të prodhuar nga zgjedhje të vjedhura, duke propozuar një kandidat nga opozita politike, është një përpjekje idealiste dhe e respektueshme dhe pse në kufijtë e pamundesisë.
Që një pushtet në delir të iluminohet e të lëshojë pushtet për të balancuar shtetin është shpresë e shëndetshme edhe pse në rastin tonë e dobët dhe thuajse ngjan miraxh i pamundur.
Por që të jesh opozitar (madje dhe konservator),të gezosh pse shumica e majtë refuzon kodet politike të arsyes se mirë dhe refuzon balancën e pushtetit për të zgjedhur një kryetar shteti nga opozita e djathtë…, është një dimension i një prapambetje të thellë të vetëdijes dhe po aq unik”, shprehet ai.
