Oerd Bylykbashi, deputet i Partisë Demokratike, në “Intervistë” në A2 CNN, deklaroi se marrëveshja e opozitës me mazhorancën për Presidentin e ri është farsë.
“Zoti Alibeaj foli për një marrëveshje, ku Partia Socialiste i jepka të drejtën opozitës që të propozojë emra për Presidentin e ri. Opozita e ka në Kushtetutë këtë të drejtë dhe nuk është aspak e vërtetë që një kandidat konsensual hyn vetëm në 3 raundet e para. Nëse ka vërtet konsensus, një kandidat i tillë mund të futet edhe në raundin e katërt e të pestë dhe të votohet me 140 vota”, tha Bylykbashi.
“Duhet të kuptojmë nëse është konsensus në duke, apo i vërtetë. Barrën për të dhënë konsensus të vërtetë e ka mazhoranca. Opozita mund të gjejë figura të denja, por nuk duket se Edi Rama ka ofruar konsensus të mirëfilltë. Rama kërkon të kapë Presidentin, nëpërmjet një kandidati që në dukje vjen nga e djathta, propozohet nga opozita, dhe në këtë mënyrë do të ketë President që nuk i shkakton shqetësime. Ne e kundërshtojmë këtë farsë dhe marrëveshja e Alibeajt prodhon pikërisht këtë gjë. Kemi parë që edhe Taulant Balla tallet me këtë marrëveshje”, shtoi Bylykbashi.
