Deputeti Oerd Bylykbashi, i mandatuar nga Komisioni i Rithemelimit për negociatat për Presidentin e ri, ka reaguar përmes rrjeteve sociale, lidhur me qëndrimet e ligjvënësit Enkelejd Alibeaj, që vijon negociatat me Taulant Ballën për Kreun e ri të Shtetit.
Bylykbashi ka zgjedhur ti përgjigjet Alibeajt me një thënie latine “verba volant, scripta manent” (fjalët fluturojnë, e shkruara mbetet).
Sipas deüutetit të PD, ajo që mbetet është që marrëveshja e Alibeajt me Ballën i garanton Ramës legjitimimin e procesit të tij për kapjen e presidentit.
“Marrëveshja i mundëson Ramës që në morinë e emrave të hedhur mbi tryezë, të fshehë emrin që ka planifikuar.
Marrëveshja që ka dakordësuar Alibeaj i mundëson Ramës që të sigurojë 84 mandate për kandidatin e tij që ta shesë si kandidat konsensual.
Marrëveshja i jep mundësi Ramës që të caktojë një opozitë hollesh përkundër opozitës së votës e me votat e tyre të caktojë presidentin e më tej, të ndryshojë sistemin zgjedhor, hartën e ndarjes territoriale, për të mbajtur pushtetin.
Alibeaj përpiqet të ndryshojë statutin e Partisë Demokratike duke anashkaluar Kuvendin Kombëtar dhe Këshillin Kombëtar, dy organet më të larta përfaqësuese të PD.
Alibeaj nuk ka asnjë tagër të mbledhë deputetët, të hedhë në tryezë emra kandidatësh për të legjitimuar procesin e Ramës.
Deputetët e Partisë Demokratike përfaqësojnë vullnetin e saj dhe nuk bëhen fasadë e kapjes së pushteteve prej Edi Ramës”, shkruan Bylykbashi.
