Deputetët socialistë arritën marrëveshje me Enkeljed Alibeajn lidhur me propozimet për Presidentin e ri. Sipas marrëveshjes gojore gjatë diskutimeve të sotme në Kuvend mes palëve, u propozua nga Alibeaj që deri në raundin e tretë, propozimet për emrin e Presidentit të ri “ti bëjë opozita”. Kreu i grupit parlamentar social Taulant Balla dha dakordësinë e tij dhe të kolegëve.
“Deri në raundin e tretë propozimet i keni ju. Ne s’po propozojmë. Sillni propozimet. Bëjeni si ta doni ju. Nëse doni të konsultoni ndonjë emër me ne thjesht na njoftoni kur. Nëse doni të vijoni në mënyrë ekskluzive atëherë… ramë dakord. Deri në raundin e tretë. Në raundin e katërt e parashikon kushtetuta pastaj (zgjidhet me shumicë të thjeshtë)”, tha Balla.
Enkeljed Alibeaj shtoi “po, por ki parasysh edhe një gjë, çdo shkelje e këtyre rregullave është shkelje e marrëveshjes”.
Opozita e ndarë
Kur u arrit marrëveshja, në sallë nga ana e deputetëve të PD-së ishin vetëm Alibej, Orjola Pampuri dhe Arbi Agalliu. Deputetët e tjerë të PD-së nuk ishin në sallë.
Nga socialistët prezentë ishin Taulant Balla, Elisa Spiropali dhe Damian Gjiknuri.
Më herët gjatë mbledhjes, Fatmir Mediu kërkoi që e gjithë opozita të dalë me një emër.
Nga ana tjetër, Taulant Balla tha se mazhoranca nuk do të pranojë propozime nga “non gratat”, duke iu referuar ish-kryeministrit Sali Berisha.
“Opozita mund të sjellë 3 kandidatë, por besoj se keni parasysh se kemi një kusht që kandidat që vjen nga katrani me bojë nuk pranojmë”, tha ai.
