Nga Boldnews.al
Rindërtimi i pallateve, banesave private, infrastrukturës rrugore, institucioneve publike, pas tërmetit të 26 nëntorit 2019, është kthyer si një mjet fitimi për dhjetëra institucione qendrore, lokale apo për drejtuesit e tyre.
Kjo, për vetë faktin se Qeveria ka nxjerrë VKM apo ka miratuar rregullore duke i dhënë “çek të bardhë” firmave të ndërtimit. Me procedura me negocim, pa shpallje të kontratës, apo tendera të kufizuar, këto institucione kanë vendosur të akordojnë qindra miliona euro, teksa gjithmonë fituesi ka marrë edhe qindarkat nga institucionet që bëjnë tenderat.
Në këto radhë do të ndalemi te Fondi Shqiptar i Zhvillimit, i cili vijon që të shpërdorojë pa kufij paratë publike, kreditë e marra apo edhe fondet e rindërtimit.
Kreu i FSHZH-së, Dritan Agolli, me një të kaluar në Bashkinë e Tiranës dhe në një firmë private, ka dijeni për të dyja anët e “medaljes”, aq sa kohët e fundit tentoi që t’u jepte tendera edhe shokëve apo punëtorëve të djalit, i cili ka një restorant luksoz në Hamallaj të Durrësit.
Boldnews.al ka siguruar dokumentet e një tenderi që ka finalizuar FSHZH, në kuadër të rindërtimit. Skema e këtij tenderi ka qenë me procedurën “tender i kufizuar (në kuadër të procesit të rindërtimit)”. Dhe, në këtë mënyre, i lind e drejta institucionit prokurues që të vendosë se kush do e fitojë tenderin.
Sipas dokumenteve, objekti i tenderit është “ndërtimi dhe rikonstruksioni i infrastrukturës publike në zonat e reja të shpallura për zhvillim të detyruar”.
Fondi limit i minikonkursit është 84.567.878 lekë pa TVSH, ose me TVSH rreth 1 milionë USD. Natyrisht, FSHZH-së i duket minikonkurs 1 milionë USD, pasi gjatë këtyre kohëve ka prokuruar qindra milionë dollarë. Apo ka bërë tendera gjysëm milioni USD për menu apo edhe për tabela orientimi.
“Objekti i minikonkursit ështa në “zonën e re për zhvillim në Spitallë, Rikonstruksioni i Rrugëve ‘Miqësia’ dhe ‘Azem Hajdari’. Loti V punime shtesë në rrugët e brendshme, njësia Administrative Spitallë, Bashkia Durrës”, thuhet në dokumentet e tenderit, ku kohëzgjatja e kontratës është vetëm 1 muaj kalendarik.
Në ligji i prokurimeve normale, pasi janë gjetur edhe hapësirat e interpretimeve shkruhet se fitues është “oferta më e ulët”, kjo nëse përmbush kushtet teknike.
Por, ky parim, “shkelet” nga Dritan Agolli, i cili në tenderin në fjalë e ka s’kualifikuar ofertën më të ulët me arsyetimin se “kërkonte pak para”. Dhe, nëse kërkon pak para nga një tender, s’ka shumë për “punë të tjera”.
Në këtë tender morën pjesë 24 firma me vlerat përkatëse. Pothuajse të gjitha firmat e ndërtimit që janë në qarkullim në Shqipëri. Pikët “maksimale” të këtij konkursi të Agollit i mori oferta e bashkimit të operatorëve “PE – VLA – KU” dhe “BIBA-X”, që ofruan 83,666,797 lekë, pra shumë afër fondit limit.
Ndërkohë, oferta më e ulët ka qenë e bashkimit të operatorëve “Alb Tiefbau” “B93” dhe “TOTILA”, të cilat ofruan 67.990.144 lekë.
Kjo ofertë, sipas dokumentit të mësipërm, është s’kualifikuar.
“Nuk ka përmbushur kërkesën e autoritetit për të dhënë sqarim me shkrim lidhur me ofertën kohore anomalisht të ulët” thuhet në dokumente. Pra, një ofertë prej 160 milionë lekësh, rreth 20 % më pak sesa vlera e akorduar. Dhe për më tepër quhet ofertë “anonimalisht e ulët”, kur në fakt problem do të ishte e kundërta.
Pyetja që lind është: përse u shpall fituese firma që mori rreth 98 % të fondit limit?!
