Ish-Kryeministri Sali Berisha, gjatë takimit me demokratët e Qarkut të Lezhës, në kuadrin e zgjedhjeve për kreun e PD, që do të mbahen më 22 maj, ka falenderuar qytetarët për mbështetjen që i dhanë procesit të rithemelimit të Partisë Demokratike dhe pluralizmit shqiptar.
Berisha duke iu drejtuar të pranishmëve tha se janë në një mision fisnik, ndoshta më të madhin e jetës së tyre.
“Në 1990 ishim në mision historik, destinacion historik, përmbysjen e komunizmit. Por në gjysmën e dytë të 2021 dhe deri më sot, ne i rikthyem vendit, në një rrugë shumë të vështirë, falë idealeve, rikthyem opozitën e vërtetë, rikthyem PD si forcë të vërtetë opozitare, rikthyem pluralizmin”, tha Berisha.
Sipas tij, forca e vetme që kishim ishte ajo e idealeve tona. “Kishim kundër një qeveri që nuk ka ligj dhe as moral, pasi kishte marrë peng opozitën. Ne kishim kundër një pseudo-opozitë, e cila shërbehej me të gjitha nga Qeveria. Por ndoshta ne kishim kundër mafien ndërkombëtare, atë të George Soros”, tha Berisha.
Ai shtoi se në një sistem që mbeti pa opozitë të vërtetë, jo vetëm institucionet shtetërore, por edhe ato private, silleshin me ju njëlloj sikur të ishin institucione shtetërore, ju kërkonin të mos ndiqni këtë lëvizje.
“Dështoi fushata për të dekurajuar përpjekjen tonë, dështuan sulmet e egra të qeverisë ndaj kësaj lëvizjeje, dështuan deklaratat e përsëritura edhe të Guvernatores, e cila jashtë çdo lloj parimi dhe marrëveshjeje, kombëtare e ndvrkombëtare, do të bënte një deklaratë për tju dekurajuar juve”, tha Berisha. Sipas tij, u bë një betejë kundër autokracisë, e cila kërkonte të tërhiqte për hunde opozitën, kërkonte ta kishte atë një freskore.
Ish-Kryeministri tha se ata dështuan në përpjekjet e tyre dhe ne sot arritëm të kemi opozitën e vërtetë, dhe jo një opozitë e shtirur, një falls opozitë.
