Autoriteti Rrugor Shqiptar tërhiqet nga vendimi i hyrë në fuqi më 1 Maj, kur rruga e Rinasit u kthye me një sens lëvizje.
Në një njoftim zyrtar këtë të Enjte, Autoriteti Rrugor bëri me dije kthimin e qarkullimit në këtë aks në gjendjen e mëparshme. “Qarkullimi do të vijojë me dy sense lëvizjeje deri në një zgjidhje përfundimtare me qëllim lehtësimin e trafikut në segmentin Qafë Kashar-Rreth-rrotullimi i Rinasit-Ahmetaq”, njofton ARRSH.
“Apel ynë për të gjithë drejtuesit e mjeteve që vijnë nga veriu të përdorin akset alternative për të mos rënduar trafikun në rrugën që të çon drejt aeroportit të Rinasit. Udhëtarë/turistët që marrin fluturimet të marrin në konsideratë fluksin e lartë të mjeteve në këtë aks duke përllogaritur orarin e nisjes”, thuhet më tej në njoftim.
Në fund të muajit Prill, autoriteti njoftoi se rruga e Rinasit do të funksiononte me një sens lëvizje nga 1 Maji pasi ka pasur fluks të shtuar lëvizjeje në këtë aks pas lehtësimit të masave anti-Covid. Po sipas ARRSH-së, nga vonesat në trafik, qytetarët kanë humbur fluturimet. Për këtë, argumentonte autoriteti, aksi u kthye me një sens lëvizje.
Por, kjo masë shkaktoi pakënaqësi te banorët përgjatë rrugës, të cilët u ngritën në protesta. Ata kërkuan kthimin në gjendjen e mëparshme, duke u shprehur se qarkullimi vetëm me një sens i penalizon në përditshmërinë e tyre dhe rrit shpenzimet monetare.
Pas dy ditëve të para të protestës, kreu i ARRSH-së Evis Berberi deklaroi se aksi do të vijojë të funksionojë me një sens lëvizje, pavarësisht kërkesave të banorëve.
Pas deklaratës së Berberit, banorët u ngritën sërish në protestë ditën e djeshme. Po kështu edhe këtë të Enjte paradite.
Në këto kushte, ARSH vendosi të tërhiqet nga vendimi, duke rikthyer qarkullimin me dy sense lëvizje në këtë aks.
Pasi u njohën me njoftimin e autoritetit, banorët ndërprenë protestën, por paralajmëruan se nëse qarkullimi bëhet sërish me një sens lëvizje, përsëri ata do të protestojnë.
