Enkeljed Alibeaj ka thirrur këtë pasdite mbledhje të grupit parlamentar të Partisë Demokratike, por për Luçiano Boçin, mbledhja është “nul”.
Thirrjen për mbledhjen në 17:00 të kësaj të Enjteje për të diskutuar për procedurat për Presidentin e ri, e ka bërë Enkelejd Alibeaj edhe pse nga Komisioni i Rithemelimit ai nuk njihet më si kryetar i Grupit Parlamentar të PD-së. Por si kryetari i grupit parlamentar të PD-së, Alibeaj mori pjesë dje Konferencën e Kryetarëve për procesin e zgjedhjes së Presidentit të ri.
Në një mesazh drejtuar dje deputetëve demokratë, Alibeaj njoftoi se mbledhja do të zhvillohej sot në selinë blu.
Por, në një reagim, deputeti i PD-së Luçiano Boçi, njëkohësisht anëtar i Komisionit të Rithemelimit, shprehet se mbledhja është nul.
Boçi thotë se ka dy arsye.
“Së pari: Zoti Alibeaj ka tagrin e Ramës dhe të Ballës, por nuk ka tagrin e demokratëve te cilët e kanë shkarkuar atë në Kuvendin e datës 30 Prill. Së dyti mbledhjen e grupit e thërret Kryesia e Grupit dhe jo një deputet, qoftë ai i njohur nga Rama si përfaqësues grupi”, shprehet ai.
“Prandaj nga ky moment kërkoj në ditët në vazhdim thirrjen e mbledhjes së Kryesisë së Grupit, për të diskutuar e vendosur për mbledhjen e Grupit Parlamentar”, shton Boçi.
“Grupi parlamentar i PD nuk mund të mblidhet sa herë e kërkon e kur e kërkon Rama-Balla. Ne nuk mund të shkojmë pas qerres së Ramës çfarëdolloj pamje të ketë ajo. Këtu nuk bëhet fjalë për bojkot. Koha e bojkotit dhe e pazareve ka perënduar. Qëndrimin politik në raport me çështjen e zgjedhjes së Presidentit e vendos Këshilli Kombëtar, si organi më i lartë vendimmarrës politik pas Kuvendit dhe e pasqyron në qëndrim Grupi Parlamentar. Kjo është rruga statutore e funksionimit të Partisë Demokratike”, përfundon ai.
