Procesi i dixhitalizimit i propaganduar nga kryeministri Edi Rama si një nga “sukseset” e radhës së qeverisë të tij, po rezulton një hall më shumë në përditshmërinë e qytetarëve hallemëdhenj të këtij vendi.
Më 27 Prill, në një aktivitetet të posaçëm, Rama lajmëroi se nga 1 Maj, 95% e shërbimeve që deri tani jepeshin nga administrata me prezencë fizike të qytetarëve, do të ktheheshin online.
“Shqipëria ka hyrë në elitën e vendeve më të zhvilluara për qeverisjen digjitale dhe është ndër të parat që i ofron shërbimet me dokumente përmes platformës kombëtare dizhiitale. Ky është një stacion historik Revolucionit Digjital ku mbarojnë radhët, zvarritjet dhe bakshishet e një epoke, që ka mbërritur në hapat e saj të fundit. Ky është një ndryshim kolosal që është edhe e bukura e kohës që jetojmë, koha e teknologjisë dhe dixhitalizimit. sot Shqipëria ka shkuar në vendin e 17-të për shërbimet digjitale dhe mbrapa nesh janë vende shumë më të zhvilluara se ne…”, do të mburrej Rama.
Në një deklaratë për gazetarët pas mbledhjeje së qeverisë më 29 Prill, ministrja e Financave u pyet se si do ti marrin shërbimet personat që kanë probleme në aksesin në internet, siç janë të moshuarit.
“Çdo institucion do të ketë në dispozicion call center dhe bashkëqeverisja do të angazhohet për të dhënë të gjithë këshillimin për përfituesit e shërbimeve online që të mos ketë problematika”, tha Delina Ibrahimaj.
Megjithatë, situata në terren shfaqet krejt ndryshe.
Në media është denoncuar se portali qeveritar E-albania ka qenë jashtë funksionit dhe qytetarët nuk po marrin dot asnjë shërbim.
Problematike mbetet situata pikërisht për personat që nuk kanë qasje në internet. Në Fier, shumë qytetarë u drejtuan drejt zyrave të ADISAS, por i gjetën të mbyllura. Një e moshuar, e dëshpëruar nga situata e krijuar, iu drejtua kamerave të gazetarëve duke i treguar një celular “Nokia” pa akses në internet.
“Ku të gjej unë telefon, ku di unë çfarë të bëj online me këtë telefon. Ku të vete? Të rri pa pension? Të sorollatem te zyrat e këtyre që të nxjerrin si fshesë”, u shpreh ajo e revoltuar.
“Jam në prag pensioni do mbyll letrat, mirëpo këta thonë online. Ku di unë, ne nuk arrijmë dot, s’kjemi as internet, si bëjmë dot. Ndaj të na lënë ndonjë zyrë të na shërbejnë ne moshatarët. Kam dhe problem me letrat e shtëpisë….”, u shpreh një tjetër e moshuar.
Situata të ngjashme raportohen në të tjera qytete të vendit.
/Boldnews.al/
