Nard Ndoka do të vijë tashmë në rolin e moderatorit. Ai ka zbuluar se gjithçka është gati për të sjellë formatin e tij që do të mbajë titullin “Hola Nardi”.
Ish-ministri ishte i ftuar mëngjesin e sotëm në Top Channel për të zbuluar më shumë rreth këtij projekti kaq të ndryshëm me çfarë jemi mësuar ta shikojmë.
“Këtu ka një problem, politika është shndërruar në teatër, edhe thashë më mirë aty ku bëhet show. Është për t’i dhënë një lloj sinjali edhe politikës. Aty ku bëhet politikë, duhet seriozitet, duhet përgjegjësi. Nëse kanë ndonjë ide për show, le të vijnë ta provojnë edhe ato. Kjo ishte një ide e imja që e kisha diskutuar me miqtë e mi para disa kohësh. Tani ishte koha e përshtatshme, sepse vura re se tashmë njerëzit kanë nevojë të qeshin, sesa të merren me politikë”, u shpreh Ndoka.
Në këtë format, Nard Ndoka do të ketë të ftuar Edi Ramën dhe Silvio Berluksonin.
“Është një format në zhvillim e e sipër, do të ketë të ftuar personazhe jo vetëm shqiptar, kjo dhe arsyeja pse emisioni ka një emër të tillë, do të ketë të ftuar nga gjithë bota. Nuk është emision politik, por do merret me politikën përmes sarkazmës dhe humori. Do kemi dhe Ramën të ftuar që t’i tregojmë se shoq do behët këtu jo në Kongres. Ai do vijë patjetër, por nuk do të jetë ai i pari i ftuar, nuk do ta ketë shansin. Silvio Berlusconin gjithashtu, besoj se do të marrë dhe bashkëshorten e re”, tha ai.
Formati i tij do të jetë brenda emisionit “E Diell” dhe pritet të nisë së shpejti.
