Lëshimi i vizave 10-vjeçare për shqiptarët nga ambasada amerikane ka sjellë fluks kërkesash. Lajmin e bën me dije ambasadorja amerikane në Tiranë Yuri Kim, e cila shprehet se aplikimet për viza kanë krijuar pritje të gjata.
Me anë të një postimi të bërë në ‘Twitter’, Kim thotë se janë të vetëdijshëm për këto vonesa mirëpo janë duke punuar shumë për të ulur kohën e pritjes.
Ambasadorja këshillon qytetarët që në rast se kanë emergjenca duhet të kërkojnë përpunim të përshpejtuar të kërkesave për vizë.
“Pas shpalljes së vizës 10-vjeçare për Shqipërinë dhe lehtësimin e kufizimeve të udhëtimit COVID, ka pasur një rritje të aplikimeve për viza, gjë që ka çuar në pritje të gjata për intervista. Ne e dimë se kjo është zhgënjyese dhe ekipi ynë konsullor po punon shumë për të ulur kohën e pritjes. Në rastet e urgjencës së vërtetë (për shembull, trajtim mjekësor, vdekje familjare, programe studentore ose shkëmbimi me afat të caktuar), ju lutemi kërkoni përpunim të përshpejtuar kur aplikoni. Ju gjithashtu mund të shkruani në [email protected] PAS të aplikoni për të kërkuar përshpejtim”, shkruan Kim në Twitter.
