Ministrja e Arsimit dhe Sportit Evis Kushi organizoi një takim me drejtues të institucioneve arsimore nga e gjithë Shqipëria.
Theksi në këtë takim u vendos tek nevoja që arsimi ka për një frymë të re në drejtimin e institucioneve, duke shpallur kështu edhe thirrjen publike për Drejtor të Përgjithshëm të Arsimit Parauniversitar.
“Kemi nevojë për frymë të re, energji të reja dhe kontribute të reja. Drejtoria e Përgjithshme e Arsimit parauniversitar ka bërë një punë kolosale dhe duhet ta pranojmë. Është një institucion që u ngrit i ri dhe i ka përballuar me sukses tërmetin dhe pandeminë, por edhe shumë vështirësi të tjera që kemi hasur gjatë kësaj periudhe. Në vazhdim të punës së mirë që është bërë, dhe për shkak të nevojës për energji të reja, për ritme të reja më të shpejta ne kemi shpallur sot thirrjen për drejtues të DPAP”- u shpreh ministrja Kushi.
Gjatë takimit me rëndësi u trajtuan edhe tema të tjera si Matura Shtetërore, përfshirja e nxënësve në vendimarrje, sfidat e marrëdhënies prindër-mësues-nxënës etj.
