Ka nisur procesi i votimit për zgjedhjen e kryetarit të degës së PD-së në Dibër.
Kutisë së votimit në Pallatin e Kulturës Peshkopi do t’i drejtohen 1200 anëtarë të Partisë Demokratike.
Kandidatë për kryetar të PD Dibër janë Ilir Krosi, ish-kryetar i bashkisë së Peshkopisë dhe Hamza Leshi, ish-kryetar i komunës së Kastriotit.
“Procesi i votimit është hapur në orën 8.00 e do të mbyllet në orën 17.00. Në rast se në Qendrat e Votimit do të ketë ende votues, procesi do të vijojë edhe pas orës 17.00, deri kur edhe anëtari i fundit i PD së degës përkatëse të ketë votuar. Për shtyrjen e votimit do të njoftohet Komisioni i Organizimit dhe Kontrollit të Operacioneve Elektorale i cili vendos.
Komisioni i Organizimit dhe Kontrollit të Operacioneve Elektorale fton të gjithë anëtarët e PD të degëve të sipërpërmendura të bëhen pjesë e procesit të votimit për zgjedhjen e Kryetarit të degës së tyre sipas parimit ‘një anëtar një votë’, për një Parti Demokratike më të bashkuar, më të fortë e më të hapur”, njofton Komisioni i Organizimit dhe Kontrollit të Operacioneve Elektorale të Partisë Demokratike.
Ky proces për zgjedhjen e kryetarit vjen pas një organizimi që ka bërë grupi i Rithemelimit në të gjitha seksionet, ndërsa më herët janë zhvilluar zgjedhje në pjesën dërrmuese të degëve të PD.
