“Do vendosim një çmim tjetër për ata që konsumojnë shumë më tepër (energji elektrike) se janë të pasur”. Kështu deklaroi këtë të Shtunë kryeministri Edi Rama nga Kongresi i PS, duke shtuar se 5% e konsumatorëve harxhojnë 25% të energjisë elektrike për abonentët familjarë.
Muajin e kaluar, Rama tha se po shqyrtohet rritja e çmimit të energjisë elektrike për ato abonentë familjarë që harxhojnë më shumë.
“Kemi filluar tani të bëjmë një studim për të hequr nga kjo mbrojtje e plotë familjet që konsumojnë shumë energji se jetojnë në kushte shumë të mira, por janë prapë një pjesë e vogël, se nuk ndryshon ndonjë gjë të madhe, por po e bëjmë dhe këtë pjesë…”, tha Rama gjatë një aktiviteti më 17 Mars.
Ndërkohë, këtë të Shtunë e bëri fakt të kryer rritjen e çmimit. Megjithatë, as këtë herë nuk dha detaje në lidhje me fashat e konsumit që do të përcaktojnë çmimin në faturën e energjisë elektrike dhe as periudhën kur do të nisë zbatimi i nismës së re.
