Kryeministri Edi Rama pohoi këtë të Enjte se çmimi i energjisë elektrike mund të rritet për disa abonentë familjarë.
Rama tha se qeveria po sheh mundësinë që të rishikohet fatura e energjisë elektrike për ata abonentë familjarë që “harxhojnë shumë energji”. Por, nuk dha detaje në lidhje me fashën e konsumit.
“… është luftë dhe kriza energjitike është e tmerrshme, se nuk po them çfarë janë parashikimet për mungesën e energjisë që mund të vijë rrugës, si nafta, por familjeve, të gjitha familjeve. Kemi filluar tani të bëjmë një studim për të hequr nga kjo mbrojtje e plotë familjet që konsumojnë shumë energji se jetojnë në kushte shumë të mira, por janë prap një pjesë e vogël, se nuk ndryshon ndonjë gjë të madhe por po e bëjmë dhe këtë pjesë, por për momentin të gjitha familjet, përfshirë dhe familjet tuaja që jeni këtu, nuk kanë asnjë rritje të çmimit të energjisë”, tha Rama.
Deklaratat i bëri në një takim me përfaqësues të furnizuesve të ushqimeve bazë me shumicë dhe shitjes me pakicë. Rama njoftoi edhe ngritjen e bordi të ngjashëm me atë që përcakton çmimin e karburanteve, për ushqimet bazë të shportës.
