Ish-kryeministri Sali Berisha deklaroi këtë të Shtunë se afera me inceneratorët zbuloi se qeveria veproi si një organizatë e mirëfilltë kriminale.
Në një prononcim nga Shkodra, Berisha tha se në aferë janë të përfshirë dhe kryeministri Edi Rama, ministra e kryebashkiakë.
“Sot kemi një organizatë kriminale lë të thotë ç’të dojë (Rama) se e kam dëgjuar që i djeg shumë kjo fjalë. Por nuk ka më kriminale, kanë arrestuar Alqi Bllakon në një kohë kur firmën e ka vendosur Edi Rama e ka vendosur Engjëll Agaçi, e ka vendosur Arben Ahmetaj, e ka vendosur Erion Veliaj, e kanë vendosur ministrat. Dhe tani duhet të thotë qe (përgjegjësia) është individuale. Jo! Kanë dalë në dritën e diellit siç janë – organizatë kriminale, plotësojnë të gjithë kriteret ligjore për të qenë të tillë. Ne s’kemi pasur dyshim fare. Por, kjo aferë i nxori siç janë”, u shpreh Berisha.
Ish-kryeministri deklaroi se “kjo është vetëm njëra nga aferat e tyre, po atë që po bëjnë me energjinë ata, është jashtë çdo imagjinate”.
“Janë lëshuar mbi pasuritë publike sikur të ishte pronë e tyre. Dhe nuk lëshojnë njeri-tjetrin bëjnë marrëveshje mafioze për të mos çelur gojën”, shtoi ai.
“Është një revolucion që duhet ti japë përgjigje kësaj klike dhe unë kam besim që do i japë. Përgjigje kësaj klike, kam shumë besim”, u shpreh Berisha.
