Këtë të Shtunë, u zhvilluan homazhe në Shkodër në nder të kujtimit të viktimave të 2 prill 1991 – që cilësohet masakra e fundit e Komunizmit në Shqipëri. Të pranishëm ishin edhe kryebashkiaku i Shkodrës Bardh Spahia dhe ish-kryeministri Sali Berisha. Ky i fundit e cilësoi qeverisë organizatë kriminale dhe bëri apel për bashkim për ta rrëzuar.
Berisha: Do bëjmë gjithçka për mbrojtjen e votës së lirë
Gjatë fjalës së tij, Berisha tha se “jemi të gatshëm për gjithçka” për mbrojtjen e votës së lirë.
“Ish-Presidenti i Shteteve të Bashkuara Ronald Regan, do të deklaronte se lirisë nuk i duhet më shumë se një gjeneratë që edhe të zhduket. Sot, pas 31 vitesh të martirizimit të tyre, vota e lirë është tërësisht e konfiskuar nga sistemi kriminal i patronazhistëve, nga tregu kriminal i blerjes dhe shitjes së votës, nga bandat e qeverisë. Martirët e 2 Prillit sot më shumë se kurrë kanë një apel për të rinjtë shqiptarë: Të vazhdojnë betejën e tyre për votën e lirë. Sot shqiptarët nuk përballen me një diktaturë staliniste, por me një qeveri e cila siç faktohet çdo ditë përbën një organizatë të vërtetë kriminale. Një qeveri e cila njëlloj si çdo organizatë tjetër kriminale vjedh e plaçkit shqiptarët, votën e tyre, liritë e tyre pasuritë e tyre”, tha Berisha nga podiumi i ngritur rishtas për aktivitetin e sotëm.
“Dhe kjo përbën një kushtrim një apel për çdo demokrate e demokrat, për çdo qytetar shqiptar: Të bashkojmë forcat për të çliruar Shqipërinë të frymëzuar nga Shkodra, nga kjo klikë që nuk ka asgjë të përbashkët me idealet e lirisë për të cilat u sakrifikuan martirët e Shkodrës, me idealet e qytetarëve të Shkodrës dhe qytetarëve shqiptarë. Ndaj dhe le të zotohemi ne para kujtimit veprës së Arben Broçit, Bujar Peshanakut, Nazmi Kryeziut, Besnik Cekës, se do bëjmë gjithçka, se jemi të gatshëm për çdo sakrificë ti rikthejmë votën e lirë shqiptarëve, për të cilën këta të rinj flijuan jetën dhe rininë e tyre”, shtoi ai.
Apeli për bashkim
Më tej, Berisha mbajti dhe një prononcim për gazetarët duke iu përgjigjur interesimit të tyre.
“Unë i respektoj të gjithë deputetët e PD. Është koha të bashkojmë forcat, energjitë tona përballë një regjimi që përbën një organizatë kriminale me aktet e plaçkitjes së këtij vendi. Është shumë e thjeshtë për tre të rinj të thuash se kanë formuar organizatë kriminale kur bëjnë veprat e paduhura. Kurse kur janë me kollare dhe me kostume, ky kategorizim, pavarësisht se vjedhin në zinxhir, pavarësisht se bashkëpunojnë me njeri-tjetrin, kjo nuk përbën organizatë. Kjo është super-organizatë”, tha Berisha.
“Edi Rama është dezikulibruar plotësisht se e sheh që nga do që lëviz i del ai është dhe unë kam besim se me qytetarët e Shkodrës dhe Shqipërisë i ka kohërat e numëruara”, u shpreh.
Presidenti i ri
I pyetur për çështjen e zgjedhjes së Presidentit të ri, Berisha konfirmoi se “ne s’kemi emër që të propozojmë, ne jemi opozitë”.
Do e votoni emrin e propozuar nga mazhoranca?
Berisha: “Absolutisht jo. Absolutisht s’votojmë në asnjë mënyrë kandidatët e Edi Ramës. Të votosh kandidatët e Edi Ramës do të thotë të çosh në Presidencë kopjen e tij”.
E pranoni konsensusin?
Berisha: Konsensusi me Edi Ramën është të puthesh me Judën.
Edhe ai ju përjashtoi, tha “nuk takohem me një person non grata”.
Berisha: Ai vuan nga kompleksi i vdekjes, edhe në gjumë ngrihet llahtar nga unë.
Si do ta mundni Ramën?
Berisha: Siç e kam mundur dy herët e tjera.
