Sali Berisha është larguar nga seanca parlamentare e të Enjtes, pas përplasjeve me drejtuesen e kësaj seance, Ermonela Felaj.
Sali Berisha kërkoi fjalën për procedurë, por drejtuesja e seancës ia mohoi, duke thënë se “fjala i jepet Tabakut menjëherë, sipas rregullores”.
Kryetari i Komanduar i PD-së, Enkelejd Alibeaj ka caktuar Jorida Takakun si përfaqësuese të Grupit Parlamentar të PD-së në Parlament, sqaroi ajo.
Pasi nuk mori fjalën, Berisha la seancën. Në një prononcim për gazetarët jashtë Kuvendit, ish-kryeministri tha se do kërkonte miratimin e një një rezolute për të dënuar reagimin e Ramës ndaj një gazetareje.
“I kërkoi gazetares burg informativ për 60 ditë për faktin e vetëm se e pyeti se si ndjehet që po krijohet një grup parlamentar në burg. Me shpirtin e tij të zi, ky person do të ishte i gatshëm që ta syrgjynoste në burgje jo 60 ditë, por 6 mijë ditë. U bëj thirrje deputeteve që të miratohet një rezolute për të dënuar këtë akt mizogjinik dhe anadollak të Edi Ramës, që ka sjellje të papranueshme ndaj vajzave, ndaj zonjave dhe zonjushave që kryejnë detyrën. Zonja Felaj nuk më dha fjalën, ndaj u detyrova që të dal para jush për të dënuar aktin e turpshëm mizogjinik të Edi Ramës”, tha Berisha.
“Absurde dhe kundër rregullores ishte ndërhyrja e zonjës Felaj, se pasi e kuptoi që unë do t’ia përplasja Edi Ramës në fytyrë, ai ia mbathi. Zonja Felaj e kuptoi që unë do ta demaskoja atë para publikuat dhe dola këtu për të denoncuar aktin mizogjenik të Ramës ndaj gazetares”, shtoi ai.
