Pas vrasjes së gjyqtarit të Apelit, Astrit Kalaja, u organizua një mbledhje urgjente me pjesëmarrjen e 260 gjyqtarëve në ambientet e Këshillit të Lartë Gjyqësor (KLGJ).
Mbledhja u zhvillua me dyer të mbyllura dhe filloi me një minutë heshtje për viktimën.
Në mbledhje u diskutua për denigrimin dhe kërcënimet ndaj gjyqtarëve nga figura publike dhe mediat, si dhe për vonesat në shqyrtimin e çështjeve gjyqësore dhe zvarritjet procedurale që kanë krijuar pasiguri në sistem.
Për të rritur sigurinë e magjistratëve, u propozuar ngritja e një Grupi Pune Ndërinstitucional, me pjesëmarrjen e gjyqtarëve, KLGJ-së, Ministrisë së Drejtësisë, Ministrisë së Brendshme, Policisë së Shtetit dhe organeve të sigurisë.
Sokol Sadushi, Kryetar i Gjykatës së Lartë, tha se vrasja e Kalasë ishte e paralajmëruar dhe se gjyqtarët janë bërë shënjestër e fyerjeve dhe kërcënimeve.
“Kjo është një vdekje e paralajmëruar. Prej vitesh, gjyqtarët janë bërë shënjestër e fyerjeve, kërcënimeve dhe denigrimeve. Duhet të ngremë një Grup Pune Ndërinstitucional për të hartuar dhe zbatuar masa sigurie.”
Gjyqtari Gerd Hoxha, tha se kanë kërkuar ndërtimin e godinave të reja gjyqësore dhe përfundimin e vendosjes së gjykatave në ambiente të papërshtatshme, si dhe përmirësimin e bashkëpunimit me Policinë.
“Kemi kërkuar ndërtimin e godinave të reja gjyqësore. Duhet të marrë fund vendosja e gjykatave nëpër ambiente të papërshtatshme dhe bashkëpunimi me Policinë duhet të përmirësohet.”
Ndërkohë gjyqtari Sandër Simoni, tha se ka ardhur koha për një analizë të thelluar të sigurisë.
“Ka ardhur koha për një analizë të thelluar të gjendjes së sigurisë. Shpresoj që kjo të jetë ngjarja e fundit e këtij lloji. Do të merren vendime për të garantuar mbrojtjen e gjyqtarëve.”
Kalaja u vra pas përfundimit të një seance gjyqësore për një çështje pronësie në Shkodër, e cila ishte në shqyrtim në Apelin e Tiranës.
Gjyqtari kishte dhënë vendimin kundër palës së përfaqësuar nga Elvis dhe Gjon Shkambi. Menjëherë pas shpalljes së vendimit, Elvis Shkambi ka nxjerrë armën dhe ka qëlluar tre herë në drejtim të gjyqtarit, duke e goditur në gjoks dhe lënë të vdekur në vend.
Gjatë të njëjtës ngjarje, janë plagosur edhe babë e bir, Rakip dhe Ervis Kurtaj, pala tjetër në proces, të cilët ndodhen aktualisht në Spitalin e Traumës dhe janë jashtë rrezikut për jetën
