Seanca e sotme plenare u mbyll pa zhvilluar debat, duke sjellë reagimin e menjëhershëm të kryetarit të grupit parlamentar të PD, Gazment Bardhi.
Ai e cilësoi vendimin si një shkelje të rëndë të Kushtetutës dhe Rregullores së Kuvendit.
Sipas Bardhit, PS po përpiqet të asgjësojë rolin e Parlamentit dhe t’u mohojë deputetëve të drejtën e fjalës. “Ka rënë shteti, sepse organi kyç kushtetues ka dalë jashtë funksionit”, tha ai.
Bardhi shtoi se mazhoranca i frikësohet debatit, sepse nuk ka ide dhe as bilanc.
Reagimi:
E paprecedentë kjo që po ndodh në Kuvend, ku PS kërkon të asgjësojë Parlamentin. E drejta e fjalës është thelbësore në një Parlament funksional. Nëse hidhet në erë Kushtetuta dhe Rregullorja e Kuvendit vetëm sepse deputetët ushtrojnë të drejtën e fjalës, duke mbyllur Kuvendin dhe duke mos lejuar debat, praktikisht ka rënë shteti sepse organi kyç kushtetues ka dalë jashtë funksioni.
Kurrë në histori nuk ka ndodhur që një mazhorancë që ka 83 deputetë, i ikën debatit dhe e trajton grupin e vet parlamentar si memec dhe karton-ngritës. Frika e mazhorancës ndaj debatit parlamentar, tregon edhe cilësinë e qeverisjes. S’kanë ide, s’kanë bilanc, prandaj nuk duan debat.
