SPAK i ka kërkuar sot Kuvendit autorizimin për arrestimin e deputetit socialist, Alqi Bllako, lidhur me aferën e inceneratorëve, ndërsa hetimet janë zhvilluar për kohën kur ai ka mbajtur postin e Sekretarit të Përgjithshëm në Ministrinë e Mjedisit.
Operacioni i SPAK i zhvilluar mëngjesin e sotëm me arrestimin e disa zyrtarëve dhe ish-zyrtarëve lidhur me këtë aferë ka gjetur pasqyrim në disa nga mediat ndërkombëtare, madje edhe në ato kineze.
“Në qytetin e Fierit, gjashtë zyrtarë dhe një administrator i impiantit të trajtimit të mbetjeve janë arrestuar sot nën akuzën e korrupsionit. Prokurorët kundër korrupsionit thanë se po kërkojnë gjithashtu të arrestojnë Alqi Bllakon, një ish-zyrtar shtetëror dhe deputet aktual i Partisë Socialiste të Shqipërisë.
Bllako, i cili ka qenë Kryeshefi Ekzekutiv i Agjencisë Kombëtare të Ujësjellës Kanalizimeve nga shkurti 2019 deri në mars 2021, dyshohet se ka marrë një ryshfet prej 15 milionë lekësh (më shumë se 120,000 euro). Sipas akuzave, ky ryshfet është marrë në formën e një rroge që i është paguar babait të tij nga një firmë që ka marrë kontratën për ndërtimin e inceneratorëve në impiantin tashmë të diskutueshëm të trajtimit të mbetjeve në Elbasan.
Prokurorët e korrupsionit që atëherë kanë sekuestruar një apartament familjar me vlerë rreth 144,000 euro.
Bllako aktualisht mbrohet nga imuniteti parlamentar, që do të thotë se ai nuk mund të ndalohet derisa parlamenti të autorizojë arrestimin e tij”, shkruajnë mediat ndërkombëtare.
Në vijim, referuar njoftimit zyrtar të SPAK thuhet se “për shtetasin Alqi Bllako, për faktin se është deputet i zgjedhur në Kuvendin e Republikës së Shqipërisë, Prokurori i Posaçëm… do të kërkojë autorizimin për arrestimin”.
“Qeveria e kryeministrit Edi Rama i dha tre kontrata për ndërtimin e impiantit të trajtimit të mbetjeve një grupi kompanish private. Marrëveshjet e kombinuara kapnin vlerën e qindra milionë eurove.
Polemikat rreth projekteve kanë çuar në një hetim nga Komisioni Hetimor, ndërsa Bashkimi Evropian kritikoi ndërtimin e impianteve të trajtimit të mbetjeve në tre raportet e fundit të progresit.
“Rama ka hedhur poshtë pretendimet se kostoja e impianteve të trajtimit të mbetjeve për taksapaguesit i kalonte qindra milionë euro.
“30.6 milionë euro janë paguar nga buxheti i shtetit për inceneratorin e Elbasanit dhe 24.7 milionë euro për atë të Fierit. Kjo është 55.3 milionë euro dhe ja ku merr përgjigjen e kësaj pyetjeje”, tha Rama në Komisionin Hetimor, “Ku e gjetët shifrën 100 milionë euro? Ku janë dokumentet që e vërtetojnë këtë? Ne duhet të kemi të njëjtat prova.”
Ish-ministri i Mjedisit Lefter Koka u arrestua në dhjetor 2021 për shpërdorim detyre në lidhje me impiantin e depozitimit të mbetjeve në Elbasan. Ai është akuzuar për krijimin e një rrjeti kompanish të rreme, të cilave në fund iu dhanë kontrata me vlerë miliona euro në lidhje me projektet.
Arrestimet e sotme vijnë pas një hetimi për uzinën e dytë të inceneratorit të mbetjeve në Fier. Një hetim për fabrikën më të madhe, në kryeqytetin e Shqipërisë, Tiranë, është në vazhdim”, shkruhet në artikull.
