Në një komunikim me gazetarët në hyrje të Kuvendit, ish-kryeministri Sali Berisha, u pyet për vendimin e një pjese të deputetëve të PD-së, lexuar disa ditë më parë, qe e kushtëzonin bashkimin e kësaj force politike me largimin e tij.
Berisha tha se ky vendim i lexuar, ishte mohuar nga një pjesë e mirë e deputetëve, dhe zbuloi edhe dy personat, që sipas tij po përpiqen që t’i fryjnë bllofit në PD, duke qenë të paguar nga Endri Fuga, këshilltari për mediat i kryeministrit Edi Rama.
Ish-kryeministri theksoi se grupi i PD-së është një dhe i vetëm, dhe askush nuk mund të marrë për bazë vendimet e Kryesisë së PD-së, sa kohë që kjo e fundit u shkri në Kuvendin e 11 Dhjetorit.
“Unë mund të them vetëm kaq, që me bllofin nuk mund të luhet, me bllofin sot mund të luajnë vetëm dyshja Baton Stanishiç-Preç Zogaj. Mos i besoni fjalëve të tyre, pasi ata mbushin xhepat te zyrat e Endri Fugës.
Askush nuk ka mundësi që të mohojë 11 Dhjetorin, grupi parlamentar është vetëm një″, tha Berisha.
