Kryeministri Edi Rama deklaroi këtë të Premte se qeveria nuk do të ulë taksat mbi naftën, por shtoi se do ndërhyjë në administrimin e furnizimit.
Në një takim me furnizuesit e naftës, Rama njoftoi ngritjen e Bordit Kombëtar të Administrimit të Karburantit. Bordi, sipas tij, do përbëhet nga përfaqësues të qeverisë dhe furnizuesve të naftës dhe do vendosë një çmim të unifikuar.
Ai lajmëroi se brenda 24 orëve, qeveria “do miratojë një Akt Normativ me fuqinë e ligjit dhe qeveria do të hyjë në administrimin e furnizimit bashkë me ju përmes një bordi kombëtar të furnizimit me karburant”.
“Çdo ditë, ju dhe qeveria, përfaqësuesit e qeverisë, konkretisht ministrja e Financave, ministrja e Energjisë, drejtori i Tatimeve, drejtori i Doganave do jenë në tryezë me 5 përfaqësues nga ju, zgjidhini ju, dhe s’do ketë asnjë tabelë në asnjë pikë karburanti ku do shfaqet një çmim që s’është miratuar nga bordi. Nëse ndodh, humb pikën e karburantit”, tha Rama.
“Duhet të rezistoni, se dimë sa do zgjasë, një muaj, dy, tre. Nëse zgjat përtej tre është situatë komplet tjetër, por për këtë periudhë kohe duhet ta ndani mendjen që do rezistoni dhe s’do fitoni”, u tha Rama – furnizuesve.
“Përveç pjesës së transparencës, s’do imponojmë çmime arbitrarisht se kjo të çon në faliment, por do bëjmë transparencën e çmimit që çdo qindarkë është aty, jo për arsye të fitimit, por vazhdimit normal të punës”, theksoi Rama.
Kryeu i qeverisë tha se mbledhja e parë e bordit do zhvillohet ditën e nesërme fizkisht. Më pas, shtoi se mbledhjet do vijohen online.
Kryeministri paralajmëroi se më e keqja është mungesa e mallit dhe kjo, sipas tij, edhe mund të ndodhë.
Lexo edhe:
Rama: Çmimin e energjisë s’po ja u ngre, ata që lëvizin me “X5” se kanë pagën 300 mijë Lekë
