Nga Boldnews.al
Para pak ditësh, ministrja e Infrastrukturës Belinda Balluku, në krah të kryeministrit Edi Rama këshilloi qytetarët që të ecnin në këmbë, si një nga masat për përballimin e krizës, me rritjen e çmimit të karburanteve.
Nuk dihet nëse kjo është një nismë e “studiuar” e Ballukut, apo ministra e Energjitikës, është mësuar me këto “vuajtje”, kur rekomandon edhe se çfarë duhet të bëjnë qytararët.
Ndoshta ka mësuar nga “këshillat” e paraardhësve të saj, të cilët, na kanë sjellë në këtë situatë ku jem, apo nga jetëgjatësia në pushtet e “shefit” të saj, teksa dita-ditës po shohin sesi në këtë vend po varfërohen familje.
Për të parë se sa seriozisht merren këshillat e Ballukut, mjaftoi një reagim i koleges së saj ministre, Bora Muzhaqi, e cila me gojën plot tha se “jam e detyruar të vij me makinë”, thënie kjo që duket se hodhi në kosh këshillën e “studiuar” të Ballukut.
Padyshim, rritja e çmimit të naftës ka sjellë rritjen në zinxhir edhe të çmimeve të produkteve të shportës, duke filluar nga vaji, buka, qumështi, etj, etj, madje edhe zarzavatet. Por, nëse ne qytetarët e thjeshtë duhet të ecim në këmbë, a veprojnë kështu zyrtarët e administratës, prfshi edhe ministrat që shfaqen si këshillues, në një kohë kur duhet të garantojnë minimalisht shmangien e abuzivizmit apo spekulimit?!
Nëse Edi Rama deklaron se jemi në luftë, jo me pushkë, por me krizën të cilën qytetarët duhet ta përballojnë me dinjitet, atëherë nisur nga kjo logjikë, të parët që duhet të trajtojnë veten si në luftë janë pikërisht zyrtarët.
Madje, duhet të përpiqen të japin shembullin më të mirë. Por kjo nuk ndodh dhe duket se në rastin konkret merr zbatim shprehja “bëni siç them unë, mos bëni si bëj unë”.
Sipas dokumenteve që disponon Boldnews.al, Drejtoria e Sherbimeve Qeveritare, drejtori e cila kujdeset për vilat apo rezidencat qeveritare, ku krerët e shtetit pushojnë apo ku bejnë takime, ka hapur një tender për blerje karburanti.
Një tender në kulmin e krizës së rritjes së çmimeve, por për shtetarët nuk ndihet pasi paguhet me taksat tona. Dhe përveç pagës, që nuk dinë sa e kanë, kan edhe luksin dhe privilegjin, që ata mos të djersijnë kur të ecin në këmbë, mos ftohen nga temperaturat e ulëta, mos lagen kur bie shi.
Në dokumentet e këtij tenderi, kjo drejtori ka hapur tenderin me objekt “blerje karburantesh për vitin 2022”, teksa fondi është 20.730.480 lekë ose me TVSH shuma shkon në plot 200 mijë euro.
Kërkohet benzinë për automjete, naftë për automjete, ku ky lot është më i madhi. Ndërkohë, kërkohet edhe naftë për kaldaja.
Pra, nëse ikin dritat dhe s’kanë kondicioner, të paktën të venë në punë gjeneratorët dhe të kenë ngrohje!
