Ish-kryeministri Sali Berisha përsëriti edhe njëherë këtë të Enjte se PD është e hapur.
Berisha dha një prononcim për gazetarët jashtë ambienteve të Kuvendit, ku iu kërkua një koment për deklaratat e Grida Dumës. Kjo e fundit kërkoi dorëheqjen e Bashës nga drejtimi i PD, por kur u pyet nëse do bashkohet me Komisionin e Rithemelimit, tha: Unë kam thënë që PD duhet të ecë përpara dhe jo të shkojë mbrapa.
Në përgjigje të interesit të gazetarëve për deklaratat e deputetes, Berisha u përgjigj: “Respektoj çdo mendim të cilitdo. Unë kam theksuar cili është qëndrimi im, i PD dhe Berishës, hapje e plotë ndaj të gjithë atyre mbi bazën e kontributeve, ndaj të gjitha atyre që pranojnë votën e lirë. Kjo është gjithçka mund të them”.
Më tej i pyetur nëse do ishte i gatshëm të largohej nga PD nëse do ishte kushti i vetëm për të bashkuar demokratët, ish-kryeministri tha: “Kushti i vetëm që mund të pranohet është vota e lirë. Unë mendoj se nëna e nëna e të gjitha problematikave në Shqipëri është dhunimi i votës së lirë”.
“Me të gjithë deputetët jam i hapur për komunikim, janë deputetë të PD-së”, u shpreh Berisha.
