Ish-Kryeministri Sali Berisha, në një intervistë për emisionin “Opinion” tha se me 6 mars koalicioni “Shtëpia e Lirisë” arriti kuotën e PD në zgjedhjet e 25 prillit, dhe duhet pasur parasysh fakti se këto zgjedhje vijnë 7 muaj pas zgjedhjeve parlamentare.
Ai tha se do të jenë të mirëpritur të gjithë ata deputetë të PD që duan të bashkohen me ne dhe të bëjmë një opozitë të fortë kundër kësaj qeverie.
Berisha tha se ne si opozitë e vërtetë morën 31 % të votave të elektoratit shqiptar dhe 70 % të votave të PD, ndërsa logo e konfiskuar me ndihmën e Edi Ramës nga Lulzim Basha, u rendit me 13 %.
Ish-Kryeministri deklaroi se kushti i vetëm për bashkimin e demokratëve është vota e lirë.
“Nuk mund të themi me Berishën apo me Bashën, apo pa Berishën apo pa Bashën, por ne duhet të themi a jemi për votën e lirë apo s´jemi për votën e lirë”, tha ish-Kryeministri.
Ai u shpreh se gjithçka duhet të përcaktohet mbi votën e lirë dhe 6 marsi tregoi se elektorati shqiptar mbështet opozitën e mbështetur nga Sali Berisha.
“Kini parasysh se në këto 6 bashki ne hymë me një sigël të re, ndaj dhe u detyrova të bëja një fushatë tejet personale. Ndërsa Basha kishte një logo që ka 30 vjet, që shqiptarët kanë emocione nga kjo logo, ndaj dhe unë isha i vetëdijshëm që duhet të bëja një fushatë personale”, tha Berisha.
Ish-Kryeministri tha se Basha është shkarkuar nga funksionet në PD dhe ai s´mund të mbajë peng as logon, as selinë e demokratëve.
Berisha tha se do të kandidojë për postin e Kryetarit të PD, duke shtuar se nuk do të bëhet pazar për votën e lirë.
