Deputeti Ervin Salianji përmes një postimi në rrjetet sociale shprehet se Lulzim Basha e ka humbur mbështetjen e demokratëve dhe si i tillë është barrë e rëndë për opozitën.
Salianji shkruan se Basha duhet të bëjë hapa pas dhe të krijojë mundësinë që PD të zhvillojë zgjedhje.
Reagimi i Salianjit vjen pas zgjedhjeve të 6 marsit, ku kandidatët e Lulzim Bashës që garonin në siglën e PD u renditën të 3-ët në garën për kryebashkiak, me përjashtim të Rrogozhinës, ku kandidati doli i dyti. Por, në tërësi PD mori mijëra vota më pak se koalicioni “Shtëpia e Lirisë” që u mbështet nga ish-Kryeministri Sali Berisha.
Postimi nga Ervin Salianji
Rezultati i zgjedhjeve të 6 Marsit ishte katastrofik për Partinë Demokratike.
Kandidatët e PDSH në 6 bashki ishin demokratë dinjitozë, ata bashkë me demokratët bënë çdo përpjekje, por fryma popullore ishte mesazh i qartë për çdo demokrat. Opozita u dëmtua dhe mori më pak se gjysmën e votave që grumbulloi më 25 Prill, bojkoti i votuesve tregoi krizën e besimit tek opozita. Të gjithë kanë përgjegjësi për këtë situatatë, përgjegjësia kryesore është tek kryetari i partisë.
Personalisht kam bërë beteja të ashpra duke rriskuar gjithçka, kam luftuar fort për të ndihmuar që Partia Demokratike të vijë në pushtet.
Kam bërë beteja që Lulzim Basha të jetë kryetar i Partisë Demokratike sepse kam menduar që ishte rruga e duhur që PDSH të vijë në pushtet!
Sot nuk mund të mbyll sytë dhe as të fshihem, duhet ta lexojmë realitetin duke marrë çdo përgjegjësi, por përgjegjësia kryesore bie tek kryetari i partisë!
Lulzim Basha e ka humbur mbështetjen, fatkeqësisht si kryetar partie është barrë e rëndë për opozitën!
LB duhet të bëjë hap pas dhe të krijojë mundësinë që PD të zhvillojë zgjedhje!
Demokratët janë fitues, nuk pranojnë të quajnë fitore vendin e tretë! Partia Demokratike do të ribëhet, forca dhe energjia e demokratëve është e pashtershme!
