Media ruse “RT” ka dhënë detaje lidhur me ç’ka u bisedua mes Vladimir Putin dhe homologut turk, Erdogan.
“Inkursioni ishte i nevojshëm për të mbrojtur njerëzit që vuanin gjenocidin në duart e Kievit, i tha presidenti homologut të tij turk”, raporton RT.
Sipas medias ruse, Putin zbuloi dhe kushtet për ndalimin e ofensivës në Ukrainë.
“Kievi duhet të pushojë së luftuari dhe të përmbushë të gjitha kërkesat e Moskës në mënyrë që pushtimi rus në Ukrainë të ndalet, i tha presidenti Vladimir Putin liderit turk Rexhep Tajip Erdogan të dielën”, thuhet më tej në raportim.
Nga ana tjetër, presidenca turke ka zbardhur qëndrimin e Erdoganit.
Presidenti turk, Recep Tayyip Erdogani, i ka kërkuar homologut të tij rus, Vladimir Putin, që të shpallë armëpushim në Ukrainë, të hapë korridoret humanitare dhe të nënshkruajë një marrëveshje paqeje, ka njoftuar zyra e presidentit turk.
Pas një telefonate njëorëshe, presidenca turke përmes një deklarate njoftoi se Erdogan i tha Putinit se Turqia është e gatshme të kontribuojë në një zgjidhje paqësore të konfliktit.
Sipas deklaratës, Erdogan tha se një armëpushim do të lehtësonte situatën humanitare.
“Presidenti Erdogan filloi bisedën me fjalinë: ‘le të hapim rrugën për paqen së bashku’”, thuhet në deklaratën për media.
“Erdogan theksoi rëndësinë e ndërmarrjes së hapave urgjente për arritjen e një armëpushimi, hapjen e korridoreve humanitare dhe nënshkrimin e një marrëveshjeje paqeje”, thuhet më tej në deklaratë.
