Është mbyllur në barazim pa gola, pjesa e parë e derbit mes Tiranës dhe Partizanit. Ndeshja nisi me një epërsi territoriale të Tiranës e cila në minutat e para e mbylli Partizanin në gjysmëfushën e vet.
Në minutën e 26-të, bardheblutë provojnë të ngacmojnë me anë të Xhixhës. Top i gjatë nga thellësia për Xhixhën i cili shfaqet para Hoxhës dhe kalon portierin me parabël, por Albion Marku është në pozicion dhe largon rrezikun para se sfera të kalojë vijën fatale.
Ndërkohë pak minuta më pas ndeshja ndërpritet për disa çaste teksa tifozët hedhin pa fund fishekzjarrë në fushë duke e bërë të pamundur zhvillimin e sfidës.
Ndërkohë, Partizani shkon afër golit në fund të pjesës së parë. Pas një goditje nga këndi, topi shkon te Bitri në shtyllën e parë. Mbrojtësi nuk gjen kuadratin me tentativën me kokë.
Në minutat shtesë Matondo ndërhyn ndaj Xhixhës në zonë dhe sulmuesi i Tiranës rrëzohet. Xhaja bën shenjë për rivënie fundore, Ndërkohë, jep një karton të verdhë për një faull reagimi të Totre ndaj Hadrojt.
