Kastrioti mori një fitore të rëndësishme në luftën për mbijetesë. Krutanët mundën Skënderbeun me rezultatin 1-0. Në përfundim të sfidës për mikrofonat e “Super Sport” ka folur trajneri Emiljano Çela.
“Futbolli vendoset nga episodet e detajet, megjithatë unë jam shumë i kënaqur për atë që dhanë djemtë sot, pasi komanduan lojën nga minuta e parë dhe nuk i dhanë asnjë mundësi kundërshtarit. Sa për statistikë, Skënderbeu nuk bëri asnjë gjuajtje në portë dhe unë duhet t’u them “bravo” futbollistëve, për seriozitetin e treguar në çdo seancë stërvitore dhe padyshim në fushën e lojës.”
“Opinioni nuk pati optimizëm për ardhjen time si trajner i Kastriotit dhe shihte skuadrën tonë si favorite për të rënë, por këtë situatë ne e kthyem në favor, duke ndryshuar mentalitetin dhe duke arritur të ndërtojmë një grup që luan shumë mirë, i cili jep gjithçka në fushën e lojës.”
Ndeshjet në transfertë
:Është e vërtetë që ne vuajmë në ndeshjet në transfertë dhe ky është një problem i vjetër, i mbartur nga faza e parë. Unë e kam nisur punën nga zero punën dhe padyshim që do të ndalemi edhe në këtë aspekt. Jemi në proces pune për mënyrën e qarkullimit të topit, pasi është shumë e rëndësishme të mbash topin në ndeshjet jashtë. Shpresoj të përmirësohemi edhe në këtë aspekt.”
Sherri në ndeshjen me Skënderbeun
“Unë e dija ngarkesën emocionale të lojtarëve të mi para kësaj ndeshjeje, pasi në transfertën e fundit në Korçë ka pasur probleme. Unë kam bërë një punë shumë të madhe për të ulur tensionin pa humbur agresivitetin, por pa përdorur shqelmat dhe dhunën. Më erdhi shumë keq që kjo ndeshje nisi me këtë episod. Futbolli nuk fitohet me shkelma”.
