Çmimi i naftës në tregun shqiptar ka pësuar sërisht një rritje të ndjeshme. Në pikat e tregtimit me pakicë të karburanteve një litër naftë po tregtohet 210 deri 220 Lekë duke arritur nivelin rekord të regjistruar në vend që prej vitit 2009.
Eksperti Zef Preçi i kërkon qeverisë që të rishikojë taksat e aplikuara në një litër naftë gjatë kësaj periudhe dhe sidomos të rrisë konkurrencën. Në një litër naftë vetëm taksat arrijnë në rreth 120 lekë duke e rënduar edhe më shumë koston te qytetarët, raporton abc.
Rritja e çmimit të naftës ka ardhur si pasojë e shtrenjtimit të naftës në tregjet ndërkombëtare për shkak të konfliktit Rusi-Ukrainë. Një fuçi naftë në bursa gjatë së enjtes është shitur me 120 dollarë. Por ajo që ndodh në tregun shqiptar është fakti se nëse rritja e çmimit në bursa reflektohet menjëherë me rritjen e çmimit të produktit në vend, kur ulen çmimet në bursat ndërkombëtare kjo nuk pasqyrohet me të njëjtin ritëm.
