Këshilltari Ligjor i Grupit Parlamentar të PD, Marash Logu, teksa ka folur për aferën e incineratorëve është shprehur se rasti më flagrant është ai i Tiranës, pasi janë dhënë rreth 35 milionë euro ndërkohë që fusha ku është projektuar ndërtimi i incineratorit është bosh.
Në një intervistë për Ora News, Logu shprehet se paratë e taksapaguesve janë dhënë për objekte që nuk janë ndërtuar.
Marash Logu: Komisioni i incineratorëve tashmë ka një bazë shumë të mirë të fakteve dhe të dokumenteve, të cilat provojnë dhe dëshmojnë shkeljet që janë kryer dhe kush janë persona përgjegjës. 430 milionë euro janë dhënë për të ndërtuar 3 incineratorë. Në rastin e incineratorit të Elbasanit prej një muaj nuk funksionon. Në rastin e incineratorit të Fierit dhe të Tiranës, siç e dini nuk ekzistojnë.
Jo vetëm paratë e takspaguesve shqiptarë janë dhënë në mënyrë abuzive me çmime të fryra, por mbi të gjitha janë dhënë për punime, janë dhënë për objekte që nuk janë kryer, rasti më flagrant ka qenë ai i Tiranës, sepse në momentin që ne pyetëm administratorin e punimeve se ku është incineratorin që janë paguar 35 milionë euro, ai na tregoi një fushë boshe.
Ndër të tjera ai tha se nëse hetimet në lidhje me këtë çështje do të shtrihen më tej zyrtarë të tjerë do të përfundojnë pas hekurave.
Marash Logu: Nga ana jonë dhe veçanërisht nga e Jorida Tabakut, u sigurua që nuk kemi asnjë moment dhe asnjë lloj tendence që të ndërhyjmë të mbivendosemi dhe të bëhemi pengesë për hetimin që është duke kryer SPAK. Komisioni Hetimor ka për qëllim që të ndihmojë për hetimet që po bëhen nga SPAK për zbardhjen e të vërtetës.
Nëse do të shtrihen hetimet e plota dhe ndaj figurave të tjera do të shohim të tjerë persona prapa hekurave. Nuk dihet se ku kanë shkuar 430 milionë euro.
