Deputetja Jorida Tabaku, e cila drejton Komisionin Hetimor parlamentar për Inceneratorët, duke replikuar në Kuvend, tha se sot ne po akuzojmë këtë Qeveri për pastrim parash.
Tabaku tha se vlera e inceneratorëve është sa 1/3 e parave që janë dhënë, ndërsa 2/3 kanë përfunduar në xhepat e qeveritarëve shqiptarë.
“Korrupsionin e ka vërtetuar SPAK, por ne po ju akuzojmë për pastrim parash. Ju keni përdorur si lecka zyrtarët e këtij shteti. Elisa, kur unë denoncoja aferën e inceneratorëve ju ishin te trau i doganës, ndërsa për Taulant Ballën po them se nuk ju akuzojmë më për korrupsion, por për pastrim parash”, tha Tabaku.
Ajo theksoi se në Komision po vijnë për të dëshmuar persona në moshën e babait të saj, apo zonja që qajnë, dhe në aspektin njerëzor kjo nuk është e mirë.
“Në atë pozitë duhet të ishin ministrat dhe zyrtarët që kanë firmosur ato letra në kundërshtim me ligjin, që i kanë dhënë 20 mln euro inceneratorit të Fierit, pa nisur asnjë ndërtim atje. Pyeteni Arben Ahmetajn me çfarë makine ka bërë aksidentin në Maqedoni, pasi me paratë e shqiptarëve janë blerë makina me vlerë 95 mijë euro”, tha Tabaku.
