Bojan Zogoviç është besimplotë se Vllaznia i ka të gjitha mundësitë të jetë afër kreut, edhe pse diferenca me Tiranën është plot 10 pikë. Në një intervistë për “Panorama Sport”, portieri malazez i shkodranëve foli për rikthimin te fitorja, ndeshjen në Laç dhe vazhdimësinë e kuqebluve. Sipas tij, e rëndësishme në këtë moment është që Vllaznia të mos gabojë më, aq më tepër që ka përpara një transfertë delikate.
Bojan, pas katër barazimeve, më në fund ia dolët të ktheheshit te fitorja ndaj Kastriotit…
Mendoj se ishte një fitore shumë e rëndësishme. Nuk ishte e lehtë, edhe pse kundërshtari është në fund të tabelës. Fituam me shumë meritë dhe mund të them se Kastrioti do të jetë një kockë e fortë për çdo skuadër në vijim.
Jeni vërtet në vendin e 4- të me 30 pikë, por shifrat janë për rekord. 11 javë që nuk humbisni, a tregon kjo se Vllaznia ka problem vetëm me konkretizimin?
Është e rëndësishme që të mos humbasim për një kohë të gjatë. Çdo pikë ka vlerë. Duhet të vazhdojmë vetëm me rezultatet pozitive dhe mendoj se do të jemi në krye të tabelës. Kur nuk humbet, është gjë tejet pozitive, por natyrisht që duhet të fitojmë më shpesh.
Si e shihni ecurinë e Vllaznisë në gjysmën e dytë të sezonit?
Çdo takim do të jetë i vështirë. Duhet që të jemi psikologjikisht gati dhe mendoj se do të vazhdojmë në një ritëm të mirë, për të marrë maksimumin nga çdo ndeshje. E shikoj me pozitivitet të ardhmen.
A mendoni se i keni mundësitë të ngushtoni diferencën që keni me Tiranën?
Sigurisht që ka mundësi. Me siguri, Tirana do të ketë edhe takime që nuk do të fitojë, por ne po shikojmë veten dhe përpiqemi të marrim sa më shumë pikë. Rëndësi ka të bëjmë mirë punën tonë.
E nisni këtë javë me Laçin. Besoni se do të jetë fitorja e tretë ndaj kësaj skuadre, që tashmë është ndjekësja më e afërt e kryesuesve?
Do të jetë një ndeshje e vështirë. Laçi është një ekip i mirë, por mendoj se kemi shanset tona për të fituar. Do të jemi gati për një lojë të fortë.
Përballë një rivali direkt si Laçi, a mund të kënaqeshit me një barazim?
Thashë se çdo pikë është e rëndësishme. Laçi është i dyti në tabelë. Ne kemi respekt për ta, por kemi cilësi dhe do të përpiqemi të fitojmë, kështu që do ta shohim në fund se çfarë do të ndodhë.
