Shembja e banesave në zonën e “5 Majit” në kryeqytet është bërë me preteksin e “rindërtimit”, por arsyeja e vërtetë po fshihet. Denoncimi bëhet nga aktivisti Titi Seranaj, i cili përmes një reagimi në rrjetet sociale tregon me dokumenta se zona e 5 “Majit” preket nga një projekt i hershëm i mbështetur fuqishëm nga pushteti qendror dhe lokal.
“Projektet e kombinatit dhe ‘5 majit’ janë pjesë e masterplanit të ‘Tirana 2030’ të planifikuara shumë kohë përpara rënies së tërmetit të 26 nëntorit 2019, tërmeti përdoret si kal troje për të grabitur pronat e qytetarëve”, shkruan Titi Seranaj.
Kujtojmë se i ashtuquajturi masterplani ‘Tirana 2030’ ishte një plan urbanistik nga arkitekti Stefano Boeri, që parshikonte projektet e viteve të ardhshme në kryeqytet, i miratuar nga shumica socialiste në vitin 2016. Masterplani u mbështet publikisht nga kryetari i Bashkisë së Tiranës Erion Veliaj si dhe kryeministri Edi Rama.
Në reagimin e tij, Seranaj sjell në vëmendje se projekti i bregut të lumit apo “5 Majit” projektuar nga mister Boeri ka këto parametra urbanistik: sipërfaqe trualli 290.000 m2, sipërfaqe ndërtimi 580.000 m2. Nga këto: 51 godina banimi, 3500 apartamente për 11.000 banorë, 5 institucione, 3 godina arsimore.
Por, shton ai, parashikohen disa banesa sociale, numri i të cilave mbetet i pazbuluar.
“Ndërkohë pyetja që do ngrinte gjithkush është: ‘përse të dëmtuarve nga tërmeti nuk iu rindërtohet shtëpia në të njëjtin truall ku banonin?”, përfundon.
