Bardhi: Nuk ka pasur asnjë sulm nga brenda selisë kundër protestuesve

Për Gazment Bardhin, personat që dolën nga brenda selisë së PD dhe goditën protestuesit si dhe hodhën gaz ndaj tyre gjatë 8 Janarit, vepruan në kushtet e vetëmbrojtjes. Këtë qëndrim mbajti Gazment Bardhi këtë të Enjte, pas daljes nga prokuroria e Tiranës, ku siç u shpreh, dha shpjegime lidhur me ngjarjet e dhunshme të ndodhura gjatë protestës në selinë e Partinë Demokratike.

Bardhi u pyet nga gazetarët lidhur me episodin në ballkonin e PD, ku persona që dolën nga brenda selisë dhunuan protestuesit. “Nuk ka patur asnjë sulm nga asnjë person nga brenda selisë. Sigurisht ka patur akte vetëmbrojtjeje për të ndaluar turmën dhe protestuesit e dhunshëm të futen në ambientet ku po zhvilloheshe mbledhje, në katin e dytë në selinë qendrore të Partisë Demokratike“, u shpreh ai.

Bardhi mohoi blindimin e dyerve në katin e parë të selisë, duke thënë se ato janë metalike dhe jo blind. Sipas tij, u vendosën për të parandaluar “planin e Sali Berishës për gjakderdhje mes demokratëve”.

LEXO EDHE  Vizita e Erdogan/ Vasili: Servilizmi i neveritshëm që e udhëheq Ramën është qesharak

Po ashtu, shtoi se do të jenë aty “sa kohë të jetë e nevojshme për të shmangur konfliktin mes demokratëve dhe sa kohë nuk pengojmë hyrje daljet në selinë qendrore të Partisë Demokratike”.

Lidhur me gazin që u hodh nga brenda selisë ndaj protestuesve, tha se ishte lënda që gjendet në fikësit e zjarrit.

“Kam rikonfirmuar se e vetmja lëndë rrethanore e gjetur në selinë qendrore në seli kanë qenë fikëset e zjarrit”, tha ai. “Çdo person në selinë e PD i është nënshtruar kontrollit fizik si dhe selia, prokuroria pohoi në seancë gjyqësore gjatë dhënies së masave se asnjë send i ndaluar s’u gjet në selinë e PD”, shtoi.