Fatbardh Kadilli, i cili kandidoi për postin e kreut të PD pak muaj më parë, në një intervistë për Faxnews, shprehet se zgjidhja e vetme që kjo parti të dalë nga kjo situatë është “dorëheqja e Lulzim Bashës dhe moskandidimi i Sali Berishës”.
Kadilli theksoi se Basha dhe Berisha po mendojnë për karrigen e tyre personale.
“Partisë vdesin në momentin kur gëlltisin gënjeshtrat që prodhojnë vetë. Të dy palët gëlltisin kush më shumë dhe kush më pak gënjeshtrat që prodhojnë vet dhe kjo është shkatërruese. Gënjeshtrat e dy palëve çfarë janë? Basha po prodhon gënjeshtrën se sot ai është një i preferuar i Amerikës dhe mbasi hoqi qafe Berishën do të jetë së shpejti në pushtet, gjë që është gënjeshtër. SHBA nuk punojnë me parti por janë aleatë të popullit shqiptar.
Gënjeshtra nga zoti Berisha është se ka forcën për të bërë revolucion dhe për të përmbysur qeverinë, nuk ka revolucion që organizohet nga një parti politike. Kjo është një përmbysje me dhunë që nuk ka ndodhur asnjëherë dhe Berisha mund të jetë afruar shumë herë në zyrat e shtetit për të bërë atë që quhet revolucion, populli ka të drejtë të ngrihet, PD ka detyrë ti tregojë rrugën se si qeveriset më mirë, jo se si shkohet me hunj dhe zjarr përballë godinave. Jam dakord me cdo protestë, por iluzioni i Berishës do të përmbyset Edi Rama është një gënjeshtër që do ta gëlltisin të vetët. Kemi një PD që po bunkerizohet rreth zotit Basha, dhe një tjetër që vetëgënjehet me konceptin e rithemelimit, të dy do të jenë copëza e PD dhje do të jetë dështimi më i madh për demoratët do të kenë në jetën e tyre nëse do ta lejojnë që të ndodhë kjo gjë”, tha Kadilli.
Sipas tij edhe 44 mijë votat e demokratëve për shkarkimin e Bashës nuk janë revolucion, por një grup i PD kundër një grupi tjetër.
“Nesër ngrihet Basha dhe bën 44.200 për të shkarkuar zotin Berisha, për mua është fatkeqësi për opozitën, të dy palët po merren me luftën e pushtetit në pallatin e opozitës, kujdesen për atë copë të PD që ta kenë për vete.
Fatkeqësia është që të dy liderët e kanë pasur të qartë skenarin që do të bëjnë në PD, duke e ndarë PD, ata u kanë dhënë iluzion mbështetsve të tyre për të pasur sa më shumë pushtet. Nuk më duhet kush ka më shumë numra, nuk është zgjidhje për demokratët, asgjë nuk është në shërbim të PD. Të dy grupe nxjerrin vendime të kundërta. Janë si dy shtete më vete secili qeveri më vete, kujt i shërben kjo? Këta të dy do ti fusin demokratët në një agoni duke u përplasur dy copa. Gjykata do ta ndajë kush ka të drejtë. Këtë i dhuruan demokratëve këta dy njerëz që janë mbështetur nga demokratët, Berishën e kemi bërë president, dy herë kryeministër kurse Bashën e mbajtëm mbi kurriz duke bërë beteja pafund. Dhe ku jemi sot ata kujdesen për vendstrehimin e tyre politik. Nuk më duhet askush as ai që mbyll bravat as ai që shqyen bravat. Dhurata më e bukur për Ramën këtë Vitr të Ri është sherri mes Bashës dhe Berishës. Kjo ka vetëm një zgjidhje që lehtëson problemin: Dorëheqja e Bashës dhe moskandidimi i Berishës”, tha Kadilli.
