Sipas MeteoAlb, moti gjatë kësaj të premte dhe të shtune do të jetë me reshje të izoluara, ndërsa pritet të kemi një përmbysje të tablos termike, ku temperaturat parashikohen të rriten në rang territori maksimumi deri në 18 gradë Celsius.
Përsa i përket ditës së dielë, pritet të kemi reshje shiu në të gjithë territorin, ndërsa në zonat malore parashikohen reshje dëbore.
“Krahasur me fillimin e kësaj jave kemi përmbysje të tablos termike, por edhe ndryshim të kushteve atmosferike duke qenë se java ka nisur me mot të kthjellët dhe temperatura shumë të ulëta. Termometri në zonat malore ka shënuar dhe minus 7 Gradë apo minus 8 Gradë Celsius. Kemi pasur sot një rritje të ndjeshme të temperaturave të ajrit me të paktën 4 gradë gjatë mëngjesit, ku termometri në zonat malore është ngjitur edhe minus 3 gradë Celsius, ndërsa gjatë orëve të mesditës presim vlera termike 16 gradë Celsius. Tjetër rritje do të kemi gjatë ditës së shtunë dhe të dielë ku pritet që në zonat malore termometri të jetë 0 apo minus 1 gradë, kurse maksimumi ngjitet dhe në rang territori edhe 18 gradë Celsius, kështu që do të kemi rritje të ndjeshme të temperaturave të ajrit, por vranësirat do të jenë shumë shpesh prezente duke filluar nga orët e para të ditës së sotme që kemi pasur reshje të pakta dhe të izoluara shiu në zonat veriore dhe qendrore. Me kthjellime mbetet jugu. Dita e shtunë do të jetë me vranësira dhe kthjellime të herëpashershme, ndërsa reshjet mbeten të izoluara në zonat veriore. Dita e dielë do të sjellë reshje në të gjithë territorin dhe në zonat malore do të kemi reshje dëbore. E diela është ajo që do të na sjellë më shumë reshje në territorin shqiptar dhe që do të përfshijnë të gjithë vendin. Sot dhe nesër reshjet mbeten të izoluara”, tha sinoptikania Adiola Bani për “Tv Klan”.
