Kreu i Prokurorisë së Posaçme Anti-Korrupsion, Arben Kraja, ka zgjedhur të ironizojë sot Lulzim Bashën, ndërsa në krah kishte diplomaten amrikane, Yuri Kim.
Nisur nga propozimet e Bashës që vettingun e politikanëve ta kryejë SPAK, Kraja tha se edhe ata që na kritikonin dje, sot kanë më shumë besim te ne.
“Edhe ata që na kritikonin tani duan të na ngarkojnë detyra shtesë. Kjo është shenjë e rritjes së besimit”, tha Arben Kraja.
Edhe sot nga salla e Parlamentit, Basha këmbënguli për vettingun e politikanëve, si një instrument për të luftuar korrupsionin, ndërsa në propozimin e depozituar prej tij në Kuvend, thuhet se këtë detyrë duhet ta bëjë SPAK. Gjithsesi propozimi kushtetues i Bashës deri më tani ka mbetur thjesht një draft-propozim, pasi nisma është parë me skepticizëm jo vetëm nga deputetë të PD-së, por edhe nga SPAK, që e konsideron një ngarkesë pune shtesë.
