Verstappen është shpallur kampion bote në Formula 1 pas një gare të çmendur në Abu Dhabi.
Ai triumfoi në pistën e Yas Marina të vendosur në xhiron e fundit. Në vendin e dytë u klasifikua piloti britanik i Mercedes, Lewis Hamilton. Ai e dominoi garën për 58 xhiro, por e humbi atë në kthesat e fundit ashtu sikurse humbi edhe titullin kampion.
Shkak u bë aksidenti i Latifit, çka solli në pistë makinën e sigurisë. Menjëherë Red Bull dërgoi në “pit stop” pilotin holandez ndërsa me rifillimin e garës pikërisht në xhiron e fundit ai parakaloi britanikun gomat e të cilit ishin tërësisht të konsumuara.
Ky është titulli i parë kampion në karrierë për Verstappen, që shkruan me të arta emrin edhe pse sot vuajti shumë. Ai e nisi garën nga “pole position”, por e humbi kreun që pas kthesës së parë dhe më pas ishte vazhdimisht në ndjekje të Hamilton.
Atij i duhej një mrekulli që ta fitonte garën e titullin dhe ajo ndodhi, kur ndodhi aksidenti i makinës Williams, 6 xhiro nga fundi, që anulloi çdo diferencë mes pilotëve në pistë.