Ambasada amerikane në Tiranë u bën thirrje qytetarëve të vetë të shmangnin Kuvendin e Partisë Demokratike, që zhvillohet ditën e nesërme në stadiumin “Air Albania”, duke filluar nga ora 10:00.
Në një njoftim në faqen zyrtare, ambasada shkruan se “një tubim politik është paralajmëruar të zhvillohet në orën 10:00 të datës 11 dhjetor në stadiumin Air Albania në Tiranë. Ky tubim mund të zhvendoset në vende të tjera në Tiranë. Madhësia dhe kohëzgjatja e saktë e grumbullimit të pritshëm nuk dihen”.
“Qytetarët amerikanë këshillohen të shmangin çdo tubim të madh në qytet. Ndërsa shumë ngjarje të mëdha publike mund të zhvillohen në mënyrë paqësore, disa situata mund të ndryshojnë shpejt dhe në mënyrë të paparashikueshme. Monitoroni mediat lokale për informacionet më të fundit dhe ndiqni udhëzimet e autoriteteve lokale të zbatimit të ligjit”, thuhet më tej në njoftim.
