A do të shtrëngohen masat anti-Covid gjatë festave të fundvitit? Ishte kjo pyetja që iu drejtua ministres së Shëndetësisë, Ogerta Manastirliu, e cila ashtu sikundër pritej ia hodhi topin Komitetit Teknik të ekspertëve, që sipas saj, vlerësojnë situatën dhe propozojnë masat.
Manastirliu tha se masat i vendos Komiteti i Ekspertëve duke vlerësuar edhe indikatorët e tjerë të situatës së pandemisë në vendin tonë. Ministrja theksoi se arma që të gjithë kemi në dorë tani është vaksinimi, duke shtuar se situata e imunizimit në vendin tonë është e qëndrueshme. Manastirliu deklaroi se qeveria nuk do të ndalet derisa çdo qytetar të jetë i mbrojtur nga virusi.
“Dua të them që vendimet merren nga komiteti i ekspertëve. Situata po ndiqet në mënyrë dinamike. Duhet të jemi të kujdesshëm për masat duke rivlerësuar masat që kemi, Esenciale është vaksinimi si armë që kemi kundër virusit apo edhe varianteve që qarkullojnë siç është edhe Omircon. Priten informacione nga institucionet ndërkombëtare për të parë sa i rrezikshëm është ai. Vaksina është arma që ne kemi”, tha ajo.
Në fakt, Komiteti Teknik i Ekspertëve, nga momenti kur u ngrit, në fillimet e pandemisë, funksionon jo më si një grup ekspertësh që vlerësojnë masat por si një Komitet Politik, përsa kohë miratohen propozime të hedhura publikisht nga Kryeministri Edi Rama apo ministrja Manastirliu, sikundër ka ndodhur edhe më parë.
