Ramazan Rraja, i shpallur në kërkim nga policia e Lezhës për ngjarjen e 13 Nëntorit, ku tre persona hynë në një lokal të maskuar dhe të armatosur, deklaron se nuk ka asnjë lidhje me krimin.
‘BalkanWeb’raporton se në bisedë telefonike me Rrajën, ky i fundit tha se e konsideron ngjarjen të stisur, ndërsa kërkoi nga prokuroria dhe policia të nxjerrin qoftë edhe një provë të vetme që e implikojnë atë.
“Është një ngjarje e stisur nga policia e prokuroria. Të më nxjerrin një fakt apo provë, dhe jam gati të paraqitem para drejtësisë, të marr dënimin maksimal. Aktualisht ndodhem në Dubai, jetoj këtu prej gushtit të këtij viti. Nuk jam arratisur nga Shqipëria, hyrje daljet e mia mund të verifikohen lirshëm”, thotë ai, ndërsa jep versionin e tij për ngjarjen.
“Natën e ngjarjes që flet policia, për të cilën më ka ngritur akuzë, kam qenë në shtëpinë time, kam video e foto për këtë, dhe prokuroria e policia e dinë shumë mirë, sepse më kanë thënë telefoni im është në përgjim. E kanë kollaj për ta zgjidhur këtë çështje”, u shpreh Rraja, ku ndër të tjera apelon që xhaxhai i tij deputet, Rrahman Rraja, të mos lakohet sa herë përmendet emri i tij.
