Transportonin refugjatë, arrestohet çifti në Tiranë

Dy persona janë vënë në pranga nga policia e Tiranës për veprat penale “Ndihma për kalim të paligjshëm të kufijve”, kryer në bashkëpunim.

Burime zyrtare nga blutë e kryeqytetit bënë me dije këtë të Shtunë se në kuadër të koduar “Couple” (Çifti), u arrestuan: D.U., 41 vjeç, i dënuar më parë për veprën penale “Prodhimi dhe shitja e narkotikëve” dhe D L.(Xh)., 35 vjeçe e dënuar më parë për veprën penale “Dhuna në familje”.

Aksioni erdhi pas informacioneve të siguruara në rrugë operative se disa persona, në bashkëpunim me njëri-tjetrin, me mjete të marra me qira, kryenin transportin e emigrantëve të paligjshëm, nga Korça drejt Tiranës, e më pas në drejtim të Kosovës dhe me destinacion final vendet e BE-së, sqaruan të njëjtat burime.

LEXO EDHE  Kikia: Ambasada e SHBA, e vendosur të përjashtojë Berishën nga klasa politike!

41-vjeçari dhe 35-vjeçarja u ndaluan në dalje të tunelit të ‘Krrabës’, duke transportuar me një mjet të marrë me qira, 4 emigrantë, të cilëve iu kishin premtuar kalimin drejt vendeve të BE-së kundrejt shpërblimit monetar, njoftoi policia.

Ata u arrestuan për veprat penale “Ndihma për kalim të paligjshëm të kufijve”, kryer në bashkëpunim.

Ndërsa refugjatët u proceduan  penalisht për veprën penale “Kalim i paligjshëm i kufirit shtetëror”.

Po punohet për dokumentimin e plotë të kësaj veprimtarie kriminale dhe identifikimin e personave të tjerë të implikuar në të, thuhet më tej në njoftimin e bluve policia.