Sekretari i Përgjithshëm i PS, Gazment Bardhi, ka vënë në dyshim sot delegatët e Qarkut të Elbasanit, që kanë firmosur për mbledhjen e Kuvendit Kombëtar të PD më 11 dhjetor.
Në emisionin “Kjo Javë” në News 24, Bardhi tha se nga emrat e publikuar sot si delegatë të Qarkut të Elbasanit, rezulton se ka mes tyre që s’janë fare delegatë.
“Unë kam informacione, në atë listë ka emra që s’janë delegatë, sikundër ka emra që s’kanë firmosur fare. Qarku i Fierit ka 411 delegatë, ndërsa thuhet se kanë firmosur mbi 500 delegatë. Pra kemi të bëjmë me një proces tallës”, tha Bardhi.
Ai u shpreh se Kuvendi i PD do të mblidhet më 18 dhjetor dhe aty do të merren vendimet dhe do ti jepen përgjigje kësaj situate që po kthehet në tallëse.
“E rëndësishme është që mos ta shndërrojmë PD në një celulë ilegale”, tha Bardhi. Ai pranoi se situata që po kalojnë demokratët është e vështirë, ndërsa u shpreh se ky proces që ka nisur ish-Kryeministri Sali Berisha nuk është interesi i PD, por personal i tij.
Bardhi tha se nuk i bën publike emrat e atyre që kanë firmosur si delegatë pa qenë delegatë të Kuvendit Kombëtar, pasi nëse do të bënte një gjë të tillë, kjo do e kthente partinë në karagjoze.
“Sekretari i Elbasanit nuk dinte as sa delegatë ka dega e kësaj partie atje. U deklarua një numër që nuk ka lidhje hiç me atë të delegatëve. Mjafton vetëm një element, sekretarët e seksioneve nuk janë delegatë të Kuvendit Kombëtar, ndërkohë që këto i paraqesin si të tillë”, tha Bardhi.
